• రాకపోకల ఖర్చులు భరించి దగ్గరుండి సపర్యలు… స్థానికుల ప్రశంసలు
మార్టూరు:
ఆపదలో ఉన్న ఓ నిరుపేద వృద్ధుడికి అండగా నిలిచి హ్యూమన్ రైట్స్ కౌన్సిల్ ఫర్ ఇండియా (HRCI) బాపట్ల జిల్లా అదనపు ప్రధాన కార్యదర్శి షేక్ మౌలాలి మానవత్వం చాటుకున్నారు.
మార్టూరుకు చెందిన 75 ఏళ్ల సుభానీ అనే వృద్ధుడికి కంటి చూపు మందగించి, అత్యవసరంగా శుక్లాల ఆపరేషన్ చేయాల్సి వచ్చింది. ఆర్థిక ఇబ్బందుల వల్ల శస్త్రచికిత్స చేయించుకోలేక ఆ వృద్ధుడు పడుతున్న అవస్థలను తెలుసుకున్న షేక్ మౌలాలి తక్షణమే స్పందించారు.
నరసరావుపేటలోని ఓ ప్రముఖ ప్రైవేట్ ఆసుపత్రి వైద్యులతో స్వయంగా మాట్లాడిన ఆయన, వృద్ధుడి దీనస్థితిని వివరించి సాధారణంగా అయ్యే ఖర్చును భారీగా తగ్గించి కేవలం రూ.15 వేలకే ఆపరేషన్ పూర్తయ్యేలా ఒప్పించారు. కేవలం ఆపరేషన్ ఖర్చు తగ్గించడమే కాకుండా, శస్త్రచికిత్స పూర్తయ్యే వరకు ఆసుపత్రిలోనే ఉండి వృద్ధుడికి అవసరమైన అన్ని సేవలను దగ్గరుండి చూసుకున్నారు. అంతేకాకుండా, ఆసుపత్రికి రాకపోకల కోసం అయ్యే ప్రయాణ ఖర్చులను సైతం మౌలాలి స్వయంగా భరించారు.
కంటి చూపు కోల్పోయే ప్రమాదంలో ఉన్న నిరుపేద వృద్ధుడికి అండగా నిలిచి, కంటి వెలుగును ప్రసాదించిన షేక్ మౌలాలిని స్థానికులు, గ్రామ పెద్దలు మనస్ఫూర్తిగా అభినందించారు. “ఆపదలో ఉన్న వారికి సకాలంలో అండగా నిలవడమే నిజమైన మానవత్వం” అని చాటిచెప్పిన ఆయన సేవా భావం పలువురికి ఆదర్శంగా నిలిచిందని పేర్కొన్నారు.
