అమరావతి:
ఆంధ్రప్రదేశ్‌లో స్థానిక సంస్థల ఎన్నికలను రాజ్యాంగబద్ధంగా, శాంతియుతంగా నిర్వహించేందుకు ఎన్డీఏ కూటమి ప్రభుత్వం పూర్తిగా కట్టుబడి ఉందని ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కళ్యాణ్ మరియు బీజేపీ రాష్ట్ర అధ్యక్షుడు పి.వి.ఎన్. మాధవ్ ఉమ్మడి పత్రికా ప్రకటనలో స్పష్టం చేశారు. స్థానిక ఎన్నికల ప్రక్రియలో రాష్ట్ర ఎన్నికల సంఘం (SEC) తీసుకునే ఏ నిర్ణయానికైనా తాము తలొగ్గి గౌరవిస్తామని వారు ప్రకటించారు.
వైసీపీ కుట్రలను తిప్పికొడతాం: కూటమి నేతలు
రాష్ట్ర పునర్నిర్మాణ సంకల్పంతో ప్రజలు ఇచ్చిన తీర్పుతో గత రెండేళ్లుగా సంక్షేమం, అభివృద్ధి, సుపరిపాలన అందిస్తున్నామని కూటమి నేతలు తెలిపారు. స్థానిక సంస్థలు బలోపేతమైనప్పుడే రాష్ట్ర సర్వతోముఖాభివృద్ధి సాధ్యమని, సకాలంలో ఎన్నికలు పూర్తి చేస్తేనే 16వ ఆర్థిక సంఘం మరియు కేంద్ర నిధులు రాష్ట్రానికి అందుతాయని వివరించారు. నిర్దేశిత గడువులోగా ఎన్నికలు జరిపి స్వపరిపాలన అందించాలన్నదే తమ ఉద్దేశమని వెల్లడించారు.
59 సార్లు కోర్టులకు వెళ్లి అడ్డంకులు!
రాష్ట్ర సంక్షేమంపై ఏమాత్రం బాధ్యత లేని వైఎస్సార్ కాంగ్రెస్ పార్టీ, ఎన్నికలు మొదలైన నాటి నుంచే అడ్డుకోవడానికి కుట్రలు పన్నుతోందని ధ్వజమెత్తారు:
ఇప్పటివరకు వివిధ న్యాయస్థానాల్లో ఏకంగా 59 సార్లు పిటిషన్లు వేసి ఎన్నికలను నిలిపివేసేందుకు వైసీపీ విఫలయత్నం చేసింది.
న్యాయపరమైన అడ్డంకులు తొలగి ఎన్నికల ప్రక్రియ కొనసాగుతుండటంతో.. పలు ప్రాంతాల్లో హింసను ప్రేరేపిస్తూ, ప్రజల రహదారులను తవ్వి విధ్వంసాలకు పాల్పడుతోంది.
విధులు నిర్వహిస్తున్న పోలీసులపై సైతం దాడులకు తెగబడుతూ భయానక వాతావరణం సృష్టించేందుకు ప్రయత్నిస్తోంది.
గత పాలన అరాచకాలు గుర్తుచేసుకోవాలి
గత వైసీపీ పాలనలో జరిగిన స్థానిక ఎన్నికల్లో ప్రజాస్వామ్యాన్ని ఏ విధంగా ఖూనీ చేశారో ప్రజలు ఇంకా మర్చిపోలేదని నేతలు గుర్తుచేశారు. నామినేషన్లు కూడా వేయనీయకుండా దాడులు చేసి, బలవంతపు ఏకగ్రీవాలతో విర్రవీగిన చరిత్ర వైసీపీది. నాటి పరిస్థితులపై స్వయంగా అప్పటి ఎస్ఈసీ కేంద్రానికి ఫిర్యాదు చేయడం, కేంద్ర బలగాల రక్షణ కోరడం రాష్ట్ర చరిత్రలోనే చీకటి అధ్యాయమని పేర్కొన్నారు.
ప్రజాస్వామ్య పరిరక్షణే కూటమి ధ్యేయం
నేడు కూటమి ప్రభుత్వం ధర్మబద్ధంగా ఎన్నికలు నిర్వహిస్తుంటే ఓర్వలేక వైసీపీ వికృత రాజకీయాలు చేస్తోందని నేతలు మండిపడ్డారు. తెలుగుదేశం, జనసేన, భారతీయ జనతా పార్టీలకు ప్రజాస్వామ్యంపై తిరుగులేని విశ్వాసం ఉందని, ఎన్నికలు నీతిగా, నిజాయితీగా, శాంతిభద్రతల నడుమ జరిగేందుకు పూర్తిగా సహకరిస్తామని భరోసా ఇచ్చారు. రాజ్యాంగబద్ధమైన ఎన్నికల ద్వారా సరైన నాయకులను ఎన్నుకుని, ప్రతి ఇంటికీ అభివృద్ధి ఫలాలు చేరడమే కూటమి అంతిమ లక్ష్యమని ఉమ్మడి ప్రకటనలో స్పష్టం చేశారు.
